ಹೂವಿನ ಅಹಂಕಾರ !!

ಮಲ್ಲಿಗೆ ಗಿಡ ಸೊಂಪಾಗಿ ಬೆಳೆದಿತ್ತು. ಚಪ್ಪರದ ತುಂಬೆಲ್ಲಾ ನಕ್ಷತ್ರಗಳನ್ನು ಉದುರಿಸಿದಂತೆ ಬೆಳಗ್ಗೆ. ಅಪ್ಪನ ಚಪ್ಪರ, ಅಮ್ಮನ ನೀರು ಗೊಬ್ಬರ ಹಾಕಿದ ಸಾಕುವಿಕೆ ಖುಷಿಕೊಟ್ಟರೂ ಮನೆಯ ಪುಟ್ಟಿ ತನ್ನ ಹೂಗಳನ್ನ ಕೀಳುವುದು ಕೋಪ ತಂದಿತ್ತು ಬಳ್ಳಿಗೆ.
ಯಾರಿಗೂ ಅರಿವಾಗದಂತೆ ಪಕ್ಕದ ಮರವನ್ನು ಹತ್ತತೊಡಗಿತು ಬಳ್ಳಿ.ಈಗ ಚಪ್ಪರದಲ್ಲಿ ಹೂಬಿಡದೆ, ಪುಟ್ಟಿಗೆ ಸಿಗದಂತೆ ಮರದ ಮೇಲೆ ಹೂ ಬಿಡಲಾರಂಭಿಸಿತು.

ಮತ್ತೊಂದು ದಿನ ಬೆಳಗ್ಗೆ ಬಳ್ಳಿ ಅಳುತ್ತಿತ್ತು, ಕಾರಣ ಪುಟ್ಟಿ ಸಣ್ಣ ಏಣಿ ತಂದು ಹೂಗಳನ್ನು ಕೊಯ್ಯುವುದಲ್ಲದೇ, ಎತ್ತರದ ಬಳ್ಳಿಯನ್ನು ಕಡಿದು ಹಾಕಿದ್ದಳು.